Rregulla të reja në horizont për Kupën e Botës 2026, që do të zhvillohet në Shtetet e Bashkuara, Kanada dhe Meksika nga 11 qershori deri më 19 korrik, pritet të ndryshojnë mënyrën si trajtohen kartonët e verdhë gjatë turneut.
Sipas raportimeve nga BBC Sport, FIFA po shqyrton një sistem të ri “amnistie”, për shkak të formatit të zgjeruar me 48 ekipe dhe më shumë ndeshje. Ideja është që kartonët e verdhë të fshihen në dy momente kyçe: pas përfundimit të fazës së grupeve dhe sërish pas çerekfinaleve.
Ky ndryshim vjen si përgjigje ndaj rritjes së numrit të ndeshjeve që një ekip duhet të luajë për të arritur në fazat finale. Me shtimin e fazës së 1/16-tës, rreziku që lojtarët të grumbullojnë kartonë dhe të mungojnë në ndeshje vendimtare është shumë më i lartë. Aktualisht, dy kartonë të verdhë në ndeshje të ndryshme sjellin pezullim për sfidën pasuese, gjë që mund të penalizojë rëndë ekipet në momentet më kritike.
Me sistemin e ri të propozuar, një lojtar do të rrezikojë pezullimin vetëm nëse merr kartonë në dy nga tre ndeshjet e grupeve, ose në dy ndeshje gjatë fazave eliminatore para çerekfinaleve. Kjo synon të ruajë balancën sportive dhe të shmangë mungesat e lojtarëve kryesorë në gjysmëfinale apo finale.
Propozimi pritet të diskutohet në mbledhjen e Këshillit të FIFA-s që po zhvillohet në Vankuver, ku mund të merret një vendim përfundimtar mbi këtë rregull të ri që mund të ndikojë ndjeshëm në rrjedhën e turneut.