E ardhmja e Karim Adeyemi te Borussia Dortmund vazhdon të jetë në qendër të vëmendjes, ndërsa kontrata e tij aktuale skadon në vitin 2027 dhe negociatat për rinovim nuk kanë arritur ende në një përfundim.
Klubi gjerman ka paraqitur prej kohësh një ofertë për zgjatjen e bashkëpunimit, ndërsa lojtari, i përfaqësuar nga agjenti i njohur Jorge Mendes, po diskuton detajet që lidhen me pagën dhe një klauzolë të mundshme largimi.
Megjithëse më herët ka pasur interes nga klubet angleze, aktualisht nuk ka sinjale për oferta konkrete, kryesisht për shkak të formës së paqëndrueshme të 24-vjeçarit në pjesën e dytë të sezonit, ku në disa raste ka mbetur edhe jashtë formacionit startues.
Në këtë situatë ka reaguar edhe partnerja e tij, Loredana, e cila gjatë një transmetimi në platformën Twitch foli për të ardhmen e sulmuesit.
Ajo theksoi se Adeyemi ka pasur mundësi për të ndryshuar klub, por ka zgjedhur të qëndrojë: sipas saj, ai është një person besnik dhe nuk merr vendime të nxituara.
Loredana komentoi gjithashtu edhe jetesën në Dortmund, duke thënë se qyteti nuk është ndër më tërheqësit, por kjo nuk ndikon në vendimet e tyre personale.
Sipas saj, lojtari ka një qasje shumë të qartë ndaj karrierës: nëse një ditë largohet nga klubi, dëshiron ta bëjë këtë me ndjenjën se ka dhënë maksimumin për ekipin.
Ajo shtoi se një nga objektivat kryesore të Adeyemit është të fitojë titullin kampion me Dortmundin, një synim që e konsideron shumë të rëndësishëm.
Ndërkohë, vetë futbollisti ka lënë të hapura të gjitha opsionet për të ardhmen, duke theksuar se gjithçka mund të ndryshojë, por aktualisht ndihet mirë në ambientin ku ndodhet.