Më 20 prill 2026, në Shkup, në territorin e komunës së Aerodrom, zyrtarët policorë nga SPB-Shkup kanë ndaluar një person me inicialet V.V. (50), banor i qytetit.
Sipas njoftimit nga Ministria e Punëve të Brendshme, gjatë një kontrolli në banesën e tij, të realizuar me urdhër gjyqësor, janë gjetur dhe sekuestruar 41 vazo me bimë që dyshohet se janë kanabis, si dhe sasi të tjera të substancave të dyshuara narkotike, përfshirë material pluhur, marihuanë dhe kapsula.
Gjithashtu, janë konfiskuar edhe pajisje që dyshohet se përdoreshin për kultivimin e bimëve, si reflektorë dhe mjete të tjera të nevojshme për këtë aktivitet.
Autoritetet bëjnë të ditur se, pas përfundimit të procedurave hetimore dhe dokumentimit të plotë të rastit, ndaj personit në fjalë do të parashtrohet kallëzim penal përkatës.