Sipas një raporti të fundit të publikuar nga Kombet e Bashkuara, popullsia botërore pritet të afrohet me shifrën 10 miliardë deri në mesin e këtij shekulli. Dokumenti i detajuar, i prezantuar në selinë e OKB-së, analizon trendet globale të lindshmërisë, migrimit dhe strukturës së popullsisë.
Parashikimet tregojnë se rritja nuk do të jetë e njëjtë në të gjitha vendet. Ndërsa disa shtete përballen me shtim të popullsisë, të tjera po përjetojnë rënie të ndjeshme demografike. Për shembull, Zvicra po diskuton masa për të kufizuar rritjen e shpejtë të popullsisë, ndërsa Serbia përballet me shqetësime serioze për tkurrjen e saj.
Studimi vlerëson gjithashtu ndryshimet në përbërjen fetare globale. Popullsia myslimane pritet të arrijë rreth 3 miliardë deri në vitin 2050, ndërsa ajo e krishterë rreth 2.9 miliardë, duke reflektuar ritme të ndryshme rritjeje në rajone të ndryshme.
Në Ballkan, sfidat demografike janë gjithnjë e më të dukshme. Shqipëria po përballet me rënie të shtimit natyror, ku lindjet janë më të ulëta ose të barabarta me vdekjet. Në anën tjetër, Kosova vazhdon të ketë një rritje pozitive të popullsisë, me nivel më të lartë lindshmërie.
Serbia konsiderohet një nga vendet më të prekura nga rënia demografike. Të dhënat tregojnë se çdo vit numri i banorëve zvogëlohet ndjeshëm, ndërsa në disa analiza thuhet se brenda një dekade vendi ka humbur rreth një milion banorë. Situata është cilësuar alarmante edhe nga vetë zyrtarët dhe mediat vendase, duke paralajmëruar se çdo vit “zhduket” një njësi e tërë administrative për shkak të rënies së popullsisë.
Megjithatë, në disa rajone brenda Serbisë, sidomos ato të banuara me shqiptarë si Lugina e Preshevës dhe pjesë të Sanxhakut, vërehet një trend i kundërt, me nivele më të larta të lindshmërisë krahasuar me pjesën tjetër të vendit.
Ekspertët theksojnë se faktorë si emigrimi, papunësia dhe kushtet ekonomike po ndikojnë ndjeshëm në këto zhvillime në të gjithë rajonin. Sipas tyre, pa politika të qarta dhe masa konkrete, disa vende mund të përballen me pasoja serioze demografike në dekadat e ardhshme