Nëse zgjoheni shpesh gjatë natës dhe në mëngjes ndiheni më të lodhur sesa kur jeni shtrirë për të fjetur, mund të jetë sinjal se zakonet tuaja të mbrëmjes kanë nevojë për ndryshim.
Mjeku britanik Amir Khan thekson se zgjidhja për problemet me gjumin rrallëherë gjendet te “trendet e shpejta” apo këshillat virale, por tek përmirësimi i asaj që quhet higjienë e gjumit. Kjo nënkupton krijimin e zakoneve të qëndrueshme dhe të shëndetshme që ndihmojnë trupin të pushojë siç duhet.
Sipas tij, cilësia e dobët e gjumit ndikon në shumë fusha të jetës, nga përqendrimi dhe vendimmarrja, deri te shëndeti i zemrës dhe tensioni i gjakut. Për këtë arsye, ai sugjeron që para çdo zgjidhjeje tjetër, të fokusoheni tek rutina e përditshme.
Një nga faktorët më të rëndësishëm është orari i rregullt. Të shkosh për të fjetur dhe të zgjohesh në të njëjtën kohë çdo ditë, edhe gjatë fundjavës, ndihmon trupin të krijojë një ritëm të qëndrueshëm biologjik. Kjo e bën më të lehtë rënien në gjumë dhe përmirëson cilësinë e pushimit. Idealisht, synoni të flini rreth shtatë deri në tetë orë çdo natë.
Po aq e rëndësishme është krijimi i një rutine qetësuese para gjumit. Aktivitetet si një dush i ngrohtë, disa ushtrime të lehta shtrirjeje, meditimi apo leximi i një libri mund t’i japin trupit sinjalin se është koha për të pushuar. Këto momente duhet të jenë larg pajisjeve elektronike, pasi ato shpesh e mbajnë trurin aktiv.
Një tjetër gabim i zakonshëm është përfshirja në biseda stresuese apo emocionale në mbrëmje. Diskutimet për punën apo shqetësimet e ditës mund ta mbajnë mendjen në tension dhe ta bëjnë shumë më të vështirë gjumin.
Po ashtu, përdorimi i telefonit, televizorit apo kompjuterit para gjumit mund të ndikojë negativisht. Drita blu që lëshojnë këto pajisje ndërhyn në ritmin natyror të trupit dhe e vështirëson procesin e të fjeturit.
Sa i përket ilaçeve për gjumë, mjeku paralajmëron se ato nuk janë zgjidhje afatgjatë. Përdorimi i tyre mund të krijojë varësi dhe nuk trajton shkakun e vërtetë të problemit. Për këtë arsye, rekomandohet që fillimisht të provohen ndryshimet në stilin e jetesës dhe të jepet kohë prej disa javësh që këto zakone të japin efekt.
Në fund, përmirësimi i gjumit nuk kërkon domosdoshmërisht metoda të komplikuara. Shpesh, janë pikërisht ndryshimet e vogla dhe të qëndrueshme ato që sjellin rezultatet më të mëdha.